直到宇宙自然終結

人死後到底有無天堂,有無地獄呢?
如果有,到底咩人先可以上天堂
咩人先去落地獄呢?

有時見到一啲社會上好黑人憎嘅高官同賺到盡嘅黑心富豪
或者公司入面好討厭嘅同事
會好想個天收佢
但真係仆街到完全無優點的人
其實係好難有
一個人無論幾衰都好
總有一啲值得你我欣賞嘅地方
我覺得地獄,應該係比邪惡到同呢個世界既任何生物死物為敵
內心嘅黑暗比無生命的宇宙更為黑暗、更為陰沉的人
佢地的靈魂死後自然會到達地獄
因為塵世間已經搵唔到一個適合收留呢個靈魂的地方

咁點先至上到天堂呢
我覺得係嗰啲已經無欲無求到
任何嘅凡塵事都唔會係佢內心留下一道痕跡
世上任何一個地方都留佢唔住的人
佢嘅靈魂輕盈到會擱淺係天上的大門度
永遠同雲朵同太陽為伍

咁我哋呢一啲好又好唔晒
衰又衰唔晒嘅平凡人會點呢?
我估應該都只會係繼續輪迴
享受上一世嘅善報
承擔上一世嘅罪孽
留下呢個凡塵,繼續喜怒哀樂
直到宇宙自然咁終結

發表迴響